गाळ्यांच्या वसुलीच्या कामात कसूर भोवली; आयुक्त डॉ. सचिन ओम्बासे यांची कारवाई

सोलापूर; महापालिकेच्या गाळ्यांच्या थकबाकी वसुलीच्या कामात अपेक्षित कार्यवाही न करणे, वरिष्ठांच्या निर्देशांचे पालन न करणे आणि तीन वेळा मुदतवाढ देऊनही सोपविलेले काम पूर्ण न करणे महापालिकेच्या कनिष्ठ श्रेणी लिपिकाला चांगलेच भोवले आहे. भूमी व मालमत्ता विभागातील कनिष्ठ श्रेणी लिपिक श्रीकांत भगवान यादव यांना महापालिका आयुक्त डॉ. सचिन ओम्बासे यांनी निलंबित केले आहे.

भूमी व मालमत्ता विभागाकडे असलेल्या महापालिकेच्या गाळ्यांच्या वसुलीशी संबंधित कामकाज यादव यांच्याकडे सोपविण्यात आले होते. मात्र, सोपविलेल्या कामात अपेक्षित प्रगती झाली नसल्याचे प्रशासनाच्या निदर्शनास आले. यासंदर्भात वरिष्ठ अधिकाऱ्यांनी वेळोवेळी सूचना देऊन काम पूर्ण करण्याचे निर्देश दिले होते. त्यानंतरही अपेक्षित कार्यवाही झाली नसल्याचे निलंबन आदेशात नमूद करण्यात आले आहे.विशेष म्हणजे, संबंधित काम पूर्ण करण्यासाठी यादव यांना यापूर्वी तीन वेळा मुदतवाढ देण्यात आली होती. महापौर, स्थायी समिती सभापती आणि उपमहापौर यांनीही वेळोवेळी आढावा बैठका घेऊन प्रलंबित कामकाज पूर्ण करण्याच्या सूचना दिल्या होत्या. वारंवार सूचना आणि मुदतवाढीनंतरही कामकाजात अपेक्षित सुधारणा न झाल्याने अखेर आयुक्तांनी निलंबनाचे पाऊल उचलले.

महाराष्ट्र नागरी सेवा (शिस्त व अपील) नियम, १९७९ मधील तरतुदीनुसार श्रीकांत यादव यांच्यावर निलंबनाची कारवाई करण्यात आली आहे. निलंबनाच्या कालावधीत त्यांना सक्षम प्राधिकाऱ्याच्या पूर्वपरवानगीशिवाय मुख्यालय सोडता येणार नाही. तसेच या कालावधीत कोणतीही खासगी नोकरी अथवा व्यवसाय करता येणार नसल्याचेही आदेशात स्पष्ट करण्यात आले आहे.

वारंवार सूचना अन् अखेर कारवाई

गाळ्यांच्या वसुलीचे काम पूर्ण करण्यासाठी प्रशासनाकडून वारंवार सूचना देण्यात आल्या होत्या. तीन वेळा मुदतवाढही देण्यात आली. लोकप्रतिनिधींच्या उपस्थितीत झालेल्या आढावा बैठकांमध्येही काम पूर्ण करण्याचे निर्देश देण्यात आले होते. मात्र, अपेक्षित कार्यवाही न झाल्याने अखेर निलंबनाची कारवाई करण्यात आली