कोल्हापूर खंडपीठाचा निर्णय; मोहोळ पोलिस ठाण्यात दाखल आहे गुन्हा
सोलापूर : पॉक्सो कायदा आणि भारतीय दंड संहितेअंतर्गत दाखल लैंगिक अत्याचाराच्या प्रकरणातील प्रकाश अशोक सोनार (वय ३६, रा. मैंदर्गी, ता. अक्कलकोट) आणि नितीन शिवानंद पोतदार (वय २१, रा. मोहोळ) या दोघांना मुंबई उच्च न्यायालयाच्या कोल्हापूर खंडपीठाने सशर्त अटकपूर्व जामीन मंजूर केला आहे. न्यायमूर्ती अश्विन डी. भोबे यांनी १९ ऑगस्ट २०२६ रोजी हा आदेश दिला. मोहोळ पोलिस ठाण्यात १४ एप्रिल २०२४ रोजी गु.र.क्र. २४७/२०२४ अन्वये दोघांविरुद्ध गुन्हा दाखल करण्यात आला होता. या प्रकरणात भारतीय दंड संहितेच्या कलम ३५४, ३५४(अ), ३५४(ब), ४५२, ३२३, ५०६ व ३४ तसेच बालकांचे लैंगिक गुन्ह्यांपासून संरक्षण (पॉक्सो) कायद्याच्या कलम ८ व १२ अन्वये गुन्ह्याची नोंद करण्यात आली होती.
फिर्यादीच्या जबाबानुसार, १३ एप्रिल २०२४ रोजी रात्री सुमारे पावणेबाराच्या सुमारास खंडाळी (ता. मोहोळ) येथील घराच्या परिसरात संबंधित प्रकार घडल्याचा आरोप करण्यात आला होता. तसेच फिर्यादीला धमकी दिल्याचाही आरोप करण्यात आला. घटनेनंतर फिर्यादीला उपचारासाठी सोलापूर येथील शासकीय रुग्णालयात दाखल करण्यात आले होते. तेथे नोंदविण्यात आलेल्या जबाबाच्या आधारे मोहोळ पोलिस ठाण्यात गुन्हा दाखल करण्यात आला.
या प्रकरणात सोनार आणि पोतदार यांनी अटकपूर्व जामिनासाठी मुंबई उच्च न्यायालयाच्या कोल्हापूर खंडपीठात अर्ज केला होता. आरोपींच्या वतीने युक्तिवाद करताना त्यांच्या अटकेची आवश्यकता नसल्याचे न्यायालयाच्या निदर्शनास आणून देण्यात आले. तपासात सहकार्य करण्यास आणि न्यायालयाने घालून दिलेल्या अटींचे पालन करण्यास आरोपी तयार असल्याचेही सांगण्यात आले. आरोपींच्या वैयक्तिक स्वातंत्र्याचा विचार करून अटकपूर्व जामीन मंजूर करण्याची विनंती बचाव पक्षाने केली. दोन्ही बाजूंचे म्हणणे ऐकल्यानंतर न्यायमूर्ती अश्विन डी. भोबे यांनी दोन्ही आरोपींचे अटकपूर्व जामीन अर्ज मंजूर करत त्यांना सशर्त अटकपूर्व जामीन दिला.
