मोहोळ, दुष्काळी परिस्थितीमुळे उसाची अपेक्षित वाढ झालेली नसल्याने यंदाच्या गळीत हंगामात टनेज आणि साखर उताऱ्यात घट होण्याची शक्यता आहे. दुसरीकडे कारखान्यांसाठी आवश्यक केमिकलच्या दरातही दीडपटीने वाढ झाल्याने साखर उद्योगासमोर दुहेरी आर्थिक संकट उभे राहिले आहे. या पार्श्वभूमीवर केंद्र शासनाने साखरेची किमान विक्री किंमत (एमएसपी) पाच हजार रुपये प्रतिक्विंटल करावी, तर रिकव्हरीमध्ये सुमारे दोन टक्क्यांची संभाव्य घट लक्षात घेऊन राज्य शासनाने ऊस उत्पादक शेतकऱ्यांना एक हजार रुपयांचे अनुदान द्यावे, अशी मागणी लोकनेते बाबुराव पाटील साखर कारखान्याचे अध्यक्ष विक्रांत ऊर्फ बाळराजे पाटील यांनी केली.
लक्ष्मीनगर येथील लोकनेते बाबुराव पाटील साखर कारखान्याच्या बॉयलर विभागात गुरुवारी बॉयलर अग्निप्रदीपन कार्यक्रम झाला. यावेळी ऊस उत्पादक शेतकरी व सभासदांशी संवाद साधताना पाटील यांनी आगामी गळीत हंगामातील अडचणींचा वेध घेतला. यंदाचा गळीत हंगाम अत्यंत अडचणीच्या आणि प्रतिकूल परिस्थितीत सुरू करावा लागत आहे. दुष्काळात शेतकऱ्यांनी मोठ्या कष्टाने ऊस जगविला. मात्र पुरेशा पाण्याअभावी उसाची अपेक्षित वाढ झालेली नाही. परिणामी प्रतिएकरी टनेज घटण्याबरोबरच साखर उताऱ्यावरही परिणाम होण्याची शक्यता आहे. याचा थेट आर्थिक फटका ऊस उत्पादक शेतकरी आणि साखर कारखाने या दोघांनाही बसू शकतो, असे पाटील यांनी सांगितले.
कारखान्यांच्या उत्पादन खर्चातही मोठी वाढ झाली आहे. विशेषतः गळीत प्रक्रियेसाठी लागणाऱ्या केमिकलच्या दरात जवळपास दीडपटीने वाढ झाली आहे. उत्पादन खर्च वाढत असताना साखरेच्या किमान विक्री किमतीत अपेक्षित वाढ झालेली नसल्याने कारखान्यांच्या आर्थिक गणितावर परिणाम होत आहे. त्यामुळे साखरेची एमएसपी पाच हजार रुपये करणे आवश्यक असल्याचे त्यांनी नमूद केले.
कार्यक्रमास सहकार परिषदेचे अध्यक्ष राजन पाटील, कारखान्याचे अध्यक्ष बाळराजे पाटील, सिनेट सदस्य अजिंक्यराणा पाटील, कार्यकारी संचालक ओमप्रकाश जोगदे, सभापती अस्लम चौधरी, नानासाहेब डोंगरे, संचालक प्रकाश चवरे, जि. प. सदस्य लखन शिंदे, बालाजी नरुटे, धनाजी गावडे, सतीश काळे, सतीश भोसले, हनमंत पोटरे, जालिंदर लांडे, दीपक माळी, रमेश माने, संजीव खिलारे, सुशील क्षीरसागर, राजकुमार पाटील, सहदेव कापसे, नवनाथ मसलकर, बाळासाहेब भोसले, ज्योती विरपे, हेमंत गरड यांच्यासह ऊस उत्पादक सभासद, शेतकरी, अधिकारी व कर्मचारी उपस्थित होते. प्रकाश चवरे यांनी सूत्रसंचालन करून आभार मानले.
‘जेवढा जास्त दर देता येईल, तेवढा देऊ’ ऊस उत्पादकांना योग्य मोबदला देण्याची कारखान्याची भूमिका स्पष्ट करताना बाळराजे पाटील म्हणाले, ‘आम्ही बोलतो तेच करतो, मोठे बोलत नाही. ऊसाला जेवढा जास्त दर देता येईल, तेवढा देण्याचा आमचा प्रयत्न राहील.’ प्रतिकूल परिस्थितीतही शेतकऱ्यांच्या हिताला प्राधान्य देऊन गळीत हंगाम यशस्वी करण्यासाठी सर्वांनी सहकार्य करावे, असे आवाहनही त्यांनी केले.
बॉयलर अग्निप्रदीपनाने हंगामाची तयारी प्रारंभी ऊस उत्पादक शेतकरी नागराज पाटील व त्यांच्या पत्नी कल्पना पाटील यांच्या हस्ते सत्यनारायण पूजा आणि अग्निपूजा करण्यात आली. बाजीराव जोशी यांनी पौरोहित्य केले. यानंतर मान्यवरांच्या हस्ते लोकनेते बाबुराव पाटील अनगरकर यांच्या प्रतिमेचे पूजन करण्यात आले. कार्यक्रमाच्या अध्यक्षस्थानी माजी आमदार यशवंत माने होते. यावेळी माने यांच्यासह देवानंद गुंड, नानासाहेब डोंगरे आणि अस्लम चौधरी यांनी मनोगत व्यक्त केले.
