सोलापूर : पवित्र पोर्टलवरील खासगी अनुदानित अल्पसंख्याक व बिगर अल्पसंख्याक शाळांमधील शिक्षक भरतीच्या जाहिराती अचानक रद्द करण्याच्या निर्णयामुळे प्राथमिक शिक्षण विभागाच्या कार्यपद्धतीवर तीव्र प्रश्नचिन्ह निर्माण झाले आहे. भरती प्रक्रिया सुरू असताना कोणतेही स्पष्ट कारण किंवा पर्यायी व्यवस्था न देता जाहिराती मागे घेण्यात आल्याने हजारो पात्र आणि बेरोजगार उमेदवारांमध्ये संतापाची लाट उसळली आहे. हा निर्णय प्रशासनाच्या नियोजनशून्य कारभाराचा नमुना असल्याची टीका शिक्षक संघटनांकडून करण्यात येत आहे.
भरती प्रक्रिया पारदर्शक, गुणवत्ताधारित आणि वेळेत पूर्ण करण्यासाठी राज्य शासनाने पवित्र पोर्टलची अंमलबजावणी केली होती. मात्र, अतिरिक्त शिक्षक समायोजनाच्या कारणावरून भरतीला स्थगिती देत जाहिराती रद्द करण्यात आल्याने संपूर्ण प्रक्रियेवरच प्रश्न उपस्थित झाले आहेत. अनेक संस्थांनी अतिरिक्त शिक्षक स्वीकारले नसतानाही सर्व उमेदवारांना एकाच निकषावर अन्यायकारक निर्णयाचा फटका बसल्याचा आरोप केला जात आहे.यामुळे हजारो युवकांचे करिअर अनिश्चिततेत सापडले असून, अनेकांनी अर्ज, कागदपत्रे, पडताळणी आणि इतर प्रक्रियेसाठी केलेला खर्चही वाया गेला आहे. दुसरीकडे, रिक्त पदे न भरल्याने विद्यार्थ्यांच्या शिक्षणावर विपरीत परिणाम होणार असून, गुणवत्तापूर्ण शिक्षणाचा हक्कही धोक्यात आल्याची चिंता व्यक्त केली जात आहे.शिक्षक सेनेने प्राथमिक शिक्षणाधिकारी व संबंधित अधिकाऱ्यांच्या भूमिकेची उच्चस्तरीय चौकशी करण्याची मागणी केली आहे.
भरती प्रक्रियेत झालेल्या विलंबाला आणि जाहिराती रद्द करण्याच्या निर्णयाला जबाबदार असलेल्या अधिकाऱ्यांवर तातडीने शिस्तभंगाची कारवाई करण्यात यावी, अशी मागणी संघटनेने केली आहे.संघटनेच्या म्हणण्यानुसार, प्रशासनाच्या दुर्लक्षामुळे पात्र उमेदवार आणि विद्यार्थी दोघांनाही फटका बसत आहे. निर्णयातील पारदर्शकता, जबाबदारी आणि उत्तरदायित्वाचा अभाव स्पष्टपणे दिसून येत असून, शासनाने तातडीने हस्तक्षेप करून भरती प्रक्रिया पूर्ववत सुरू करावी. अन्यथा राज्यभर तीव्र आंदोलन छेडण्याचा इशारा शिक्षक संघटनांनी दिला आहे.अतिरिक्त शिक्षकांचे समायोजन करणे आवश्यक आहे.
अतिरिक्त शिक्षकांना अनेक संस्थांनी हजर करून घेतले नाही, अशा संस्थांना नोटिसा बजावण्यात आल्या आहेत. ज्या शाळांनी अतिरिक्त शिक्षकांना हजर करून घेतले नाही, त्यांचे प्रस्ताव मंजूर करू नयेत, असे शासनाचेच आदेश आहेत. त्याठिकाणी असलेले शिक्षकाचे पद शासनाच्या नियमानुसार व्यापगत करण्याची कार्यवाही सुरू आहे. कादर शेख, प्राथमिक शिक्षणाधिकारी
