शहर वाहतूक शाखेची जबाबदारी ; एसीपी मनोज यादवांकडे ..!

सोलापूर | सोलापूर शहर पोलिस दलातील वरिष्ठ अधिकाऱ्यांच्या जबाबदाऱ्यांमध्ये महत्त्वाचे फेरबदल करण्यात आले असून, शहर वाहतूक शाखेची धुरा आता सहाय्यक पोलिस आयुक्त मनोज यादव यांच्याकडे सोपविण्यात आली आहे. यापूर्वी वाहतूक शाखेचा कार्यभार पाहणारे सहाय्यक पोलिस आयुक्त अरुण देवकर यांच्याकडे आता परिमंडळ-१ चा अतिरिक्त पदभार देण्यात आला आहे. यापूर्वी परिमंडळ-१ चे सहाय्यक पोलिस आयुक्त गणेश बोराटे यांची बदली झाली होती. त्यांच्या रिक्त झालेल्या जागेवर नवीन अधिकारी रुजू होईपर्यंत ही जबाबदारी अरुण देवकर यांच्याकडे सोपविण्याचा निर्णय पोलिस आयुक्तालयाने घेतला आहे.

त्याचवेळी, शहरातील वाहतूक व्यवस्थापन अधिक सक्षम करण्याच्या उद्देशाने सहाय्यक पोलिस आयुक्त मनोज यादव यांच्याकडे शहर वाहतूक शाखेचा पदभार देण्यात आला आहे. वाहतूक कोंडी, नियमांचे काटेकोर पालन, तसेच शहरातील वाढत्या वाहनसंख्येच्या पार्श्वभूमीवर वाहतूक शाखेची जबाबदारी अधिक प्रभावीपणे पार पाडली जाईल, अशी अपेक्षा व्यक्त केली जात आहे.

या प्रशासकीय बदलामुळे परिमंडळ-१ आणि शहर वाहतूक शाखेचे कामकाज अधिक गतिमान होण्यास मदत होणार असून, नव्या जबाबदाऱ्यांमुळे दोन्ही अधिकाऱ्यांसमोर कायदा व सुव्यवस्था तसेच वाहतूक नियंत्रणाची मोठी जबाबदारी असणार आहे.