सोलापूर : पवित्र प्रणालीद्वारे घेण्यात आलेल्या शिक्षक अभियोग्यता व बुद्धिमत्ता चाचणी (TAIT)-२०२५ अंतर्गत गुणवत्तेनुसार पात्र ठरलेल्या उमेदवारांच्या शिक्षक पदभरती प्रक्रियेला वेग आला आहे. जिल्हा परिषद सोलापूरच्या प्राथमिक शिक्षण विभागामार्फत मराठी माध्यमाच्या निवड यादीतील अनुक्रमांक १ ते ३४९ अशा एकूण ३४९ उमेदवारांच्या कागदपत्रांची पडताळणी करण्यात येणार आहे शिक्षणाधिकारी (प्राथमिक) विशाल मुळे यांनी दिलेल्या माहितीनुसार, पवित्र पोर्टलवर प्राप्त गुणांच्या आधारे निवड झालेल्या उमेदवारांची दोन टप्प्यांत कागदपत्र पडताळणी केली जाणार आहे. बुधवार, २ सप्टेंबर रोजी निवड यादीतील अनुक्रमांक १ ते १७५, तर गुरुवार, ३ सप्टेंबर रोजी अनुक्रमांक १७६ ते ३४९ मधील उमेदवारांच्या कागदपत्रांची तपासणी होणार आहे.
जवाहरलाल नेहरू मुलांचे वसतिगृह, पार्क चौक, सोलापूर येथे सकाळी १० वाजल्यापासून ही प्रक्रिया सुरू होणार आहे. उमेदवारांनी निर्धारित वेळेत स्वतः उपस्थित राहणे अनिवार्य आहे. पडताळणीसाठी पवित्र पोर्टलवर नमूद केलेली सर्व आवश्यक मूळ कागदपत्रे, साक्षांकित छायांकित प्रती तसेच संबंधित अन्य कागदपत्रे सोबत आणण्याच्या सूचना देण्यात आल्या आहेत. कागदपत्र पडताळणीची प्रक्रिया पारदर्शक आणि नियमानुसार पूर्ण करण्यासाठी प्राथमिक शिक्षण विभागाकडून आवश्यक नियोजन करण्यात आले आहे. पडताळणीच्या वेळी आवश्यक कागदपत्रे उपलब्ध नसल्यास किंवा उमेदवार निर्धारित दिवशी अनुपस्थित राहिल्यास त्याचा परिणाम पुढील निवड प्रक्रियेवर होऊ शकतो, असे शिक्षणाधिकारी मुळे यांनी स्पष्ट केले.
कागदपत्रांची पूर्वतयारी करूनच या : मुळे “पवित्र प्रणालीअंतर्गत शिक्षक पदभरतीची प्रक्रिया गुणवत्तेच्या आधारे आणि पारदर्शक पद्धतीने राबविण्यात येत आहे. निवड झालेल्या प्रत्येक उमेदवाराने निर्धारित वेळेत उपस्थित राहून कागदपत्र पडताळणीची कार्यवाही पूर्ण करावी. कोणतीही अडचण उद्भवू नये यासाठी आवश्यक कागदपत्रांची पूर्वतयारी करून उमेदवारांनी वेळेत उपस्थित राहावे,” असे आवाहन शिक्षणाधिकारी (प्राथमिक) विशाल मुळे यांनी केले आहे.
