सोलापूर : महानगरपालिकेच्या हद्दवाढ भागातील प्रभाग क्रमांक २६ मधील कल्याणनगर परिसरात लक्ष्मी मंदिरासमोरील ड्रेनेज तुंबल्याने सांडपाणी रस्त्यावरून वाहत होते. त्यामुळे परिसरातील नागरिकांना दुर्गंधी आणि अस्वच्छतेचा त्रास सहन करावा लागत होता. नागरिकांची समस्या लक्षात येताच नगरसेवक दीपक जमादार यांनी संबंधित मनपा अधिकाऱ्यांशी संपर्क साधून तातडीने उपाययोजना करण्याच्या सूचना दिल्या.ड्रेनेजमधून घाण पाणी बाहेर वाहत असल्याने परिसरात अस्वच्छतेचे वातावरण निर्माण झाले होते. तसेच नागरिकांच्या आरोग्याचा प्रश्न निर्माण होण्याची शक्यता होती.
ही बाब निदर्शनास आल्यानंतर नगरसेवक जमादार यांनी अधिकाऱ्यांना प्रत्यक्ष काम सुरू करण्याच्या सूचना दिल्या. त्यानंतर मनपा कर्मचाऱ्यांकडून ड्रेनेज दुरुस्ती व साफसफाईचे काम सुरू करण्यात आले.अनेक दिवसांपासून भेडसावत असलेल्या समस्येवर तातडीने कार्यवाही सुरू झाल्याने परिसरातील नागरिकांनी समाधान व्यक्त केले. नागरिकांच्या मूलभूत सुविधांशी संबंधित प्रश्नांकडे प्रशासनाने तत्परतेने लक्ष देऊन त्यावर कायमस्वरूपी उपाययोजना करावी, अशी अपेक्षाही नागरिकांनी व्यक्त केली.
